«Седяк, гармония!» ошонь фестивалесь-пелькстамось. (ЭРЗЯ)

Те кенярксчись зярыя иень перть вейсэнди гармониясо седицятнень ды раськень моронь вечкицятнень. Фестиваленть прявт путовксозо – Мордовиясо зярыя раськетнень вейсэнь эрямонь койтнень пропагандась, раськень инструментальной, вокальной музыкань ды гармониясо седямонь койтне, ёроков ломантнень муемась-редямось.
Малав кавто часонь перть артистнэ кенярдовтсть ваныцятнень фольклоронь моросо, неень шкань обработка марто раськень моросо ды эсест сермадовт произведениясо. Николай Оськин седи гармониясо омбоце классто саезь, корты зярдо берянь ёжомарямозо, сеске сайсы кедезэнзэ гармониянть ды сестэ весе берянесь стувтови.
Ламот морыцятнень эйстэ зярыя иенть перть невтить пряст те фестивальсэнть. Сех вадря седицятненень, гармонистэнь ансамблятненень, гармония мельга моронь морыцятненень залось казсь виев цяпамот.
Те иестэнть гармониянь вечкицятнень учось казне-концертэсь ютавтовсь кавксть, 13-во ды 17- ге чассо. Ютавтыцятнень валост коряс, весе билеттнэ ульнесть рамазь зярыя ковдо икеле. Те корты седе, што фестивалесь учовиця ды вечкевиця ламонь туртов.