Санкт-Петербург ошсо ютась «Уникум» фестивалесь – пелькстамось. (ЭРЗЯ)
Сонзэ анокстыцязо – РФ-нь культурань министерствась. Котоцеде те ошсонть пурнавкшность кедьчелькев сех вадря од ломантне. Кенярдовты, зярыя иень перть фестиваленть изницякс кармасть Мордовиянь эйкакштнэ. Те иестэнть изнясь Саран ошонь 4-це номер эйкакшонь художественной школань тонавтницясь Егор Тришкин.
Зярыя иень перть те художественной школань тонавтницятне изнить «Уникум» пелькстамосонть. Тувталось – важодить тесэ эсь тевень содыця ломанть, конат весе виест путыть эйкакштнэнь тонавтомантень! 40 иетнень перть, зярс ули те школась – тестэ лиссть ламо ёроков эйкакшт. А мезесь седеяк пек кенярдовты – сонзэ выпускниктне, сынсь сыть важодеме тиринь художественной школас.
Пелькстамос арсезель кучомс Егор Тришкинэнь «Сурский пчеловод» важодесксэнть. Тейсь эйсэнзэ кавто ковонь перть. Керсемань тевентень цёрынькась тонавтни омбоце ие. Тонавтыцянть, Александр Рябовонь, валонзо коряс – топавты тень превень путозь, школасо занятиятнеде башка керси кудосояк. Санкт-Петербургов молемань куватьс карми лецтнеме.
Тешкстама, те художественной школасо керсемантень тонавты Александр Рябов, содавикс керсицянь, артыцянь кудораськестэ церась. Сонзэ тонавтницянзо те аволь васенце покш изнямо. Пелькстамонь жюринть мелензэ коряс, кучозь важодематне невтевсть весень туртов. 4-це номер эйкакшонь художественной школань тонавтницясь Егор Тришкин те пелькстамосонть сайсь омбоце тарка. Кемтяно, те сонзэ аволь меельце изнявксозо!