«Сиянь толгась» – Мордовиясо! (ЭРЗЯ)
Неть читнестэ ютавтозь тиринь ды рузонь кельтнень тонавтыцятнень ютксо Весероссиянь мастер-классонь меельце этапонь цётавкстнэ пек кенярдовтызь минек региононь ломантнень! 10 иень ютазь ламо раськетнень ютксо пелькстамонь Гран-Прись тагояк минек! Изницянть –Саран ошонь 4-це номер лицеень эрзянь келень тонавтыцянть Александр Учеваткинэнь марто вастовомась ютась «Интервью» программань студиясо. «Весе стакачитне, талноматне ды мелявтоматне печтязь, аравтозь путовкстнэ топавтозь»,- седейшкава корты Александр Учеваткин. Те иень пелькстамосонть ёрокчист ды содамочист невтсть 123 тонавтыцят Россиянь 56 регионсто. Финалс понгсть ансяк 41. 2 ковонь перть мольсь виев анокстамось. Цетамось- диплом, кубок ды прявт казнесь «Сиянь толгась». 2 чинь перть весе вийтне каязельть важодемас. Мастер-класс, методикань комментарият, раськень оршамонь ды выставкань невтема! Ёвтама, Мордовиясто од тонавтыцясь яволявтсь прядонзо жюринть икеле пелькстамонь ушодовомсто, зярдо лиссь стакачи программанть ветямосо. Ёвтазель мель- витемс тевенть. Александр Учеваткин сеске лиссь пурнавозтнень икелев ды ютавтсь эрзянь келень урок, конасонть евтнесь эрзянь раськеде, морась эрзянь морот, мейсэ кепетизе весе пурнавозтнень мельёжост. Покш цяпамосо вастызь пурнавозтне раьскень оршамопельде ды эрямопингеде невтевксэнть. Пелькстамотнеде башка ютавтозель домка кортамо масторонок регионтнэсэ тиринь кельтнень тонавтомадост. Мельстуиця кортамонть ванодо «Интервью» программасо, кона лиси эфирс “Россия 24” каналсо сундерьковонь 22-це чистэ 22.15, “Россия 1″каналсо сы овторикстэ 9чассто. Пачтяса, неть читнестэ Александр Учеваткин тонавтницянзо марто сырги Казанев, научно-практической конференцияв ды Россиянь раськетнень кельсэ тонавтницятнень ловноматнес. Арсетяно од изнявкст!