Саратов енкссо ютась «Шумбрат, ялгат!» эрзя-мокшонь раськень кенярксчи! (ЭРЗЯ)
Саратов енксонь Петровской буень Оркино велесэ ожоковонь меельце читнестэ ютась эрзя-мокшонь раськень культурань кенярксчи. Тов якась делегация минек регионстояк. Шумбрат! Те валось сядоксть гайгсь Оркино велесэ кенярксчистэнть. Раськень покшчис сакшность тежа ветесядодо ламо ломанть. Еще чадыковсто Саратов енксонь губернаторось Валерий Радаев яволявтсь эрьгелемачинь ютавтомадо. Ды вана, весе инжетне содавтовить минек раськень койтнень-кирдатнень марто. Эрзя-мокшонь раськень культурань куншкакуронть икеле невтевить эрзянь кудот-чить, презентационной палаткат. Тесэ кудоютконь кедьенкст, раськень ярсамопельть ды оршамопельть. Губернаторонь еще вейке тевтопавтовксокс кармась эрзя-мокшонь раськень культурань кункшкакуронь одкстомтомась. Те иестэнть витнезель фасадось, полавтозь латось, витнезь зрительной залось. Течи культурань кудосонть роботыть ерокчинь 9 кружокт. Алкуксонь шнамо таркакс кармась эрзя-мокшонь раськень культурань музеесь. Сонзэ пурнызе Александр Кузнецов. Кенярксчис сазь инжетне ютасть одкстомтозь залонтень. Пурнавозтнень икеле морась «Кучугуры» Оркинань фольклорной ансамблясь. Саратов енксонь губернаторось тешкстызе покшчинть эрявиксчинзэ. Оркинось – сюпав история ды раськень кой марто кезэрень веле. Эрицятне ванстыть эсест культуранть, секскак те эрямо таркась карми Саратов ёнксонь еще вейке туристической маршрутокс. Сы иень кизна тесэ арсить ютавтомс покш фестиваль.