Пенза ёнксонь Никольскоень буень Сабанова велесэ литературань ды этнографиянь покш вастовомась вейсэндинзе эрзянь келень, литературань ды культурань кастыцятнень (эрзя)
Весемесь алтазь Россиянь раськетнень вейкетьксчинь иентень. Покшчисэ кортасть Василий Радаев (Радин-Аловский) эрзянь сёрмадыцянть шкинемадо. Кенярдовтызь весень Мордовиясто инжетнеяк. «Ламзурь» фольклоронь ды этнографиянь раськень морокурос совицятне ютавтсть урьвакстомань-мирденень лисемань кой, Ольга Дорофеева тонавтыцясь панжизе эрзянь келенть сюпавчинзэ, Дарья Каткова эйкакшонь кужосо важодицясь ютавтсь эрзянь някань теемань коряс мастер-класс. Теке марто гайгсть мазый морот.
Вастовоманть ютавтыцятне – лелят-ялакст Александр ды Дмитрий Архиповтне Сабанова велесэ чачозетне, «Этно Лаб» шкинемань теварсевксэнь финалс лисицятне А. С. Пушкин лемсэ МР-нь раськень ловнома кудонь Раськень ды краеведениянь литературань куронь, МР-нь сёрмадыцянь вейсэндявксонть, эрзянь раськень койтнень-кирдатнень, келень ванстомань ды кастомань-кепетемань фондонть лезксэст вельде.