Республикань Судебнай департаментонь Управленияса 5 кизода ламос ашель оцюня (мокша)
Мордовиянь Оцюнясь Артём Здунов примась участия Республикаса Судебнай департаментть Управлениянь оцюнять лемонц азомаса. Тя вастти путф Харис Якуббаев, инголи сон вятезе Инсаронь аймакть. Ромодановань районца шачфть ули местнай самоуправлениянь оргаттнень эса административнай работань оцю опытоц, тяконь лувксса регионъётконь уровеньца федеральнай структуратнень эса.
Республикань Судебнай департаментонь Управленияса 5 кизода ламос ашель оцюня. Эрявикс ширетнень ёткса, конат вешихть эрь шинь ванома, Мордовиянь Оцюнясь азозень аф пельксть тиеманц и терроризмать эзда судонь зданиятнень араламасна и правосудиянь процессть кучсеманц, кадрань анокламась, тиемс суттненди покодемань условият, максомс синь аппаратснонды тефт. Мекольдень 3 кизотнень республикаса пяк лама тиф мировой судьятнень покодемань условияснон цебярьгофтомаса — 44 участкатнень эзда оцю пялькссна ётафтфт ни пара условиятненди. Лядыкс 9 участкатнень коряс кизефкссь тяфта жа пяшкотькшневи, синь петевихть и путови сембось, мезе эряви. Россиянь Верховнай Судть видеса Судебнай департаментть Генеральнай директорть полафтыец Алексей Слотюк азсь сюконямань валхт региононь вятити ня кизефксненди мялень шарфнеманкса.
Харис Якуббаев депутаттнень и Инсар аймаконь эряйхнень лемста азсь сюконямань валхт Мордовиянь Оцюняти муниципалитетть ширенц кирдеманкса и азсь мяль нинге сяда лац покодемс од вастса.