«Шумбрачинь ванстома» раськень теварсевксэсь (эрзя)
Мордовиясо шумбрачинь ванстомань васенце эскелькссэ ютавтовить покш полавтомат. «Шумбрачинь ванстома» раськень теварсевксэнть лувсо республиканок келес одкстомтовить шумбрачинь витемань организациятне. Истя, Ромодановань 1-це номер поликлиникасо поладови покш одкстомтомась лецямонь корпуссо. Важодематне молить кавто кепедьксэнь кудосо. Эйсэнзэ аштить лабораториясь ды 35 таркас чинь стационарось. Кудосонть пес полавтовить валдонь ды лембень максомань систематне. Аволь умок важодицятне прядызь латонь вельтявксонь одкстомтоманть. Истяжо важодемань покш пельксэсь прядовсь лецямонь корпусонь омбоце кепедькссэ: киякстнэ валозь стяжкасо, путозь плитка, штукатурязь палатань ды коридоронь стенатне. Стявтыцятне анокстыть совамонь таркань блоктнень стявтомантень. Васенце кепедькссэ истяжо ютыть одкстомтомань важодематне, кундасть вастомань таркань паролгавтомантень.
Паролгавтови-мазылгавтови перьканзо таркаськак, ютксост арсеви полавтомс поребрикенть. Те важодемась топавтозь 80-нь процентс. Одкстомтозь корпусос рамить од туворт-эземть. Пациентнэнень теить ютавиця ды чарькодевикс маршрутизация. Прядомс одкстомтоманть арсеви 2025-це иестэ.