Мордовиясо панжовсть концертэнь виртуальной 4 таркат (эрзя)
«Культура» раськень теварсевксэнь «Цифрань культура» региононь проектэнть вельде Мордовиясо тедеде анокстазь концертэнь виртуальной ниле таркат. Панжовсть сынь малав ковдо икеле ды анокт вастомс классикань музыкантень питнень максыцятнень. Виртуальной нупальтне панжовсть Сарансо 6-це номер эйкакшонь музыкань школасо ды И.Д. Воронин лемсэ Мордовиянь краеведениянь музеень колмо филиалтнэсэ.
Те лия ёнов а молиця тев, тиринь ёнксонь апак кадо, малавгадомс республикань эрицятнень масторонь музыкань искусствантень. Концертэнь виртуальной нупальтнень теемга рамазель неень шкань мультимедиянь оборудования, ютксост экранонь панельть, акустикань системат, ноутбукт ды микшерэнь пультт. Весе те эряза интернетэнтень нолдамонть марто лезды невтемс артисттнэнь морамост-киштемаст ды налксемаст малав коламовтомо.
Весе таркатнень панжомас тердезельть ваныцят. Инсарсо истямокс кармасть 2-це номер школань тонавтницятне. Сынь кунсолызь «Александр Волковонь «Волшебник Изумрудного города» ёвксонь ёвтнемань мотивенть коряс концертэнь трансляциянть.
Ардатовасо школань лагерень эйкакштненень невтизь «Кошкин дом» музыкань-поэтической фантазиянть. Темниковасо «Радуга» шумбрачинь витемань эйкакшонь кизэнь лагерень пакшатне маризь Московонь государственной академиянь симфониянь оркестрань «Мой первый Чайковский» программанть. Саранонь 6-це номер эйкакшонь музыкань школань тонавтницятне ды тонавтыцятне маризь П.И. Чайковскиень фортепианань-симфониянь сех содавикс произведениянть.
Ледстясынек, Мордовиясо концентэнь виртуальной таркатне истяжо важодить Л. П. Кирюков лемсэ Саранонь музыкань училищасо, Рузаевкань искусствань школасо, Ковылкинань ды Краснослободскоень буетнень культурань куншкакуротнесэ.