Росреестрань и Минимуществань коллегиять колга (мокша)
Исяк региононь столицаса пуроптовсь МР-нь транспортонь и дорожнай хозяйствань Госкомитетонь итоговай коллегия, коса ульсть Артём Здунов и Россиянь транспортонь министрсь Виталий Савельев. Тяда башка Саранск ошса ётась Мордовиянь модань и имущественнай сотксонь министерствань и Росреестрань марстонь коллегиясь. Корхтасть покодемань итокнень, а стане жа “Пространственнай даннайхнень коряс национальнай система” единай цифровой платформать эряфс ётафнеманц колга.
Максомс имуществаса эффективнай вятема и регионтти модань ресурст, синь ванфтомаснон — Мордовиянь сембода од министерствать прявкс задачанза. Тя ширеса уш улихть цебярь полафкст. Ётай кизоня мольфтевсь оцю покодема собственностень эрь кодама уровеньц имуществань максомать, а стане жа Мордовияти сявоманц коряс. Тяфта, федеральнай и муниципальнай собственностьста республикань уровеньц максфоль движимай имуществань 190 наименованият.
Министерствась тии оцю покодема собственностень правань государственнай регистрациять коряс и республикань собственностень аф движимай имуществань вещнай правать коряс, кона кемокстаф эрявикс учреждениятнень и предприятиятнень мельге. Сембось тя тиеви имуществать республикань хозяйственнай оборотс путоманцты. Тя кизоня министерствась аноклась кинь карта. Тянь вельде муниципалитеттнень оцюняснон мархта ули кода варжамс модань аф целевой сявомать и касфтомс бюджетть доходонзон.
Коллегияса Н.П. Огарёвонь лемса университетть и министерствать ёткса подписандафоль соглашения пространственнай даннайхнень анализсон коряс ширеса. Пуромксса инь цебярь покодихне казьфтольхть сюконямань сёрмаса и почётнай грамотаса.