Мордовиясь Эрьзявтомо – аволь Мордовия! (эрзя)

Эрзянь-мокшонь раськень ине цёрадо сёрмадыть книгат, нолдыть документальной ды художественной фильмат, сонензэ алтыть театрань путовкст.
Культурань чись, кона ютась Мордовиянь павильонсо “Россия” невтемасо-форумсо ВДНХ-со, васняяк алтазель “пек превей керсицянтень”. “Мордовиянь раськень брендт” республикань теварсевксэнть лувсо невтсть “Эрьзя. Валдос ливтиця” спектаклясто саевкс, конань путызе Мордовиянь государственной раськень драмань театрась; ульнесь скульптордо содавтомань фильмань невтема; ютавтсть Раськень театрань налксицянть Павел Михайловонь налксемасо С.Д. Эрьзянь скульптуратнень авторонь презентация ды Степан Эрьзянь важодематнень виртуальной экспозициява экскурсия. Плазмань панельтнесэ вейке роликтне полавтсть омбонстнэнь.
Эрьвасонть – коллекциянь произведениятнень пелькске, конань таштазь вансты Мастерэнть лемень кантниця Музеесь. Мордовиянь лия брендтнэ истяжо ульнесть стендэнь инжетнень пельде покш вановт ало, а культурань, раськень политикань ды архивень тевень министрась Светлана Баулина тердинзе весень содавтомс 75-це павильононть: “Художественной промыслатне, раськень культурась – свалшкань, сынь варштавтыть эсест алкусчисэнть, седейшкавасо, мазычисэ. Республикань стендсэнть эрьва инжесь марясы Мордовиянь лембенть»!