Мокшонь викшневксэсь «Россия» невтемасо (эрзя)

ВДНХ-со «Россия» Раськеютконь невтемасо ютась культурань Чи.
Сонзэ лувсо пурнавозтне содавтовсть сех вадря практикатнень ды содамочитнень марто, невтизь эсест региононь брендтнэнь ды культурасо топодематнень. Мордовия Республикань куросонть 13-це региононь представительтне ёвтнесть минек содавикс масторонь историядо ды культурадо, ютавтсть эрзятнень ды мокшотнень коень промыслатнень коряс мастер-класст.
Зубова-Полянань буень Жуковкань школань тонавтыцясь Светлана Алексеевна Панишкина Мордовиянь декоративно-прикладной шкинемань сех вадря мастертнэнь ютксо невтинзе эсензэ мазыйдеяк мазый важодематнень, конат теезь човалясто викшнемань техникасо. Кедьчелькев аванть мазыльматне теезь Мордовиянь чивалгомань буень мокшонь раськень оршамопелень коень викшнематнень ды тешкстнэнь мельсэ кирдезь.
Мокшонь раськень оршамопелень лия ёнов амолиця мазыльматнень теемань салавачитнень кедьчелькев авась саинзе жуковкань кезэрень мастерицатнень пельде. Светлана Алексеевна бажи муемс ды вельмевтемс эсензэ теевкстнэнэ покштятнень-бабатнень койтнень ды кирдатнень тевкадовксост. Секскак мазыльматнень башка ёнксось ды эрьва сёрмадовксось канды смустень эсензэ чарькодьксчи.
Оймесэ ушодксонтень токамодонть мейле, сон цидярдозь, эсь тевентень содамочи, вечкема марто, теевкстнэсэ нолды тевс кезэрень сёрмадовкстнэнь.