«Войнань шкань эйкакшт» республикань вейсэндявксонтень 5 иеть! (ЭРЗЯ)

Неть ломантне сеедьстэ пурнавкшныть вейс, ютавтнить кругловой стувор экшсэ вастовомат, кортнить эсест юткова стакачитнеде ды топавтовкстнэде. Пролетарской райононь ветеранонь советс совицятне тешкстызь «Войнань шкань эйкакшт» республикань вейсэндявксонть вете иетнень топодеманть.
Од ломантнень патриотической мелень кастомась а топавтови ансяк ветеранонь советнэнь вельде. Покш лезэ теньсэ кандыть эйкакшонь учреждениятне. Екатерина Чиглинцевань туртов те медалесь-покштояк покш казне. Ветеранонь советсэ сон важоди колоньгеменде ламо иеть. Сон кармась сеть пурныцятнень эйстэ вейкекс, кона ушодызе ды топавтыде пес «Подвиг и память» книганть.
Промкссонть тешкстазель — Пролетарской районсо ули весе, штобу седе ламо мель явомс эйкакшонь ды од ломанень патриотической кастомантень. Тесэ улить 10 школат, кавто техникумт, вете библиотекат, 16-во музейть. Школань стадиотнэсэ сеедьстэ ютавтневить од ламантнень марто эрьва кодат мероприятият, школатнесэ улиця музейтнесэ тонавтницятне вастовкшнить ине войнань ветерантнэнь марто. Эрьва иес ветеранонь советэсь аноксты программа, косо сёрмадсы весе сеть мероприятиятнень, конантнень арсить ютавтомс иень перть. Советэнть пингстэ пурназь виев лекторской группа. Кеме сюлмавомат Советэсь кирди тимуровецтнэнь ды волонтёртнэнь марто.
Покш казнекс ветерантнэнь туртов кармась анокстазь концертэсь. Саранск ошонь васенце номер школань тонавтницятне ёвтнесть стихть, а «Луч» культурань кудонь «Рябинушка» хорось казсь весень туртов мазый морот. Эряви тешкстамс истят вастовоматне ютыть «Луч надежды» кужосонть, кона пурназель зярыя иеть теде икеле С.Я. Маршак лемсэ библиотекасо.