Тувонь африканской чумась уш Мордовиянть вакссо. (ЭРЗЯ)

Шабра регионтнэнь зярыя таркава ливтезь лангс те вирусной ормась. Республиказонок совамо таркатнесэ роботыть ветеринарной контролень зярыя пункт. Орманть кардамодо кортась ютазь совещаниясонть Владимир Волков. Сон кармавтсь теемс ванстомань зона ды пштистэ ваномс сонзэ роботамонзо мельга. Эрьва машинанть, конась сови 13-це региононь территорияс, ванкшныть специалист. Водительтненень эряви невтемс грузонть лангс документт. Бути кортамось моли ярсамопельде, сестэ эрявить ещё и ветеринаронь пельде меремат. Хозяйстватнеде башка стакачить кандыть идем тувотне. Башка мель явови лия региононь машинатненень. Апак вано сень лангс, што документнэ парт, чарытнень эрявить валномс-шлямс постонть лангсо, ведь орманть можна ускомс сынст лангсояк. Ней африкань чумась ули Рязанень ды Пензань ёнкстнэсэ. Тостонь автомобильтненень явови башка мель. Ковонь перть ванкшнозь 3 пель марто тёжат транспортной средстват. Бути вешематне а топавтовить, машинась велявтови кудов. Торбеевасо те тевенть мельга пшти ванома. Границанть эйстэ а васоло ашти сывелень переработкань покш комплекс. Эрьва чи тей продукция мельга сыть фурат Россиянь регионтнэстэ. Постнэнь чинек-венек роботамось, автомобильтнень ванкшномась ды башка составсо валномась, малав 4 тёжат биологической пробань саемась кудонь ды идем тувотнестэ – вана истят ветеринарной службань цётамотне. Качествадонть жо корты се тевесь, што 10 иень перть республикасонть те ормась арасель вестькак.

Комментарии

Комментариев нет.

This blog is kept spam free by WP-SpamFree.

Главное сегодня