Телень самонтень анокстамодо. (ЭРЗЯ)

Уштомань шкантень анокстамонь этаптнестэ вейкесь — трубань опрессовкась. Давлениянь максома шкасто сынст вансызь нардевчинть ды герметичностенть лангс. Кармить полавтозь каладо участкатне, одкстомтозь панельной шовтнэ ды латотне. Анна Лусс куронь вейке кудосонть калавтызь латонть, полавтызь вельтявксонть, одкстомтызь вентиляциянь шахтанть. Ней моли пиземлатонь путомась, штобу ведесь а понговоль трубатнень потс. Пролетарской районсо вельтявксонь полавтовомась муниципальной ды капремонтонь фондонь программатнень коряс моли малав колоньгемень ламоквартирань кудотнесэ. Одкстомтомо арсить 18 000 кавонзань метрат. Теке марто, кода мерсть управляющей компаниясонть, телентень анокстамось молевель бу седе куроксто, бути собственниктне шкастонзо пандовлизь эрямо таркаст кисэ пандовкстнэнь. Неть ярмактнень лангс одкстомтомс можна улевель ещё зярыя кудонь латотнень. Алексей Савиновонь, подрядной организациянь прявтонть валонзо коряс, латонь одкстомтомантень мешить закононь колазь путозь интернетэнь ды телевидениянь кабельтне. Норматнень кирдезь сынст эряви путомс фасадтнэнь кувалт. Целанек регионсонок телентень анокстамось моли планонь коряс. Эрямонь фондось анок 91 процентс, лембень максомань пунктнэ — 87. Графикенть эйстэ аламодо кадовить Рузаевкасо ды Лямбирень районсо. Мордовиянь ЖКХ-нь министрась Алексей Тюркин ёвтызе управляющей компаниятнень икеле собственниктнень долгонь цифранть. Иень ушодовомсто сон ульнесь миллиардто ламо.

Комментарии

Комментариев нет.

This blog is kept spam free by WP-SpamFree.

Главное сегодня