Сёрмадей, драматург, журналист! Андрей Куторкинэнь чачома чистэнзэ саезь 110 иетненень (ЭРЗЯ)
Васенце произведениянзо сёрмадозельть ютазь пингень 30-це иетнестэ, эзизе кадо вечкевикс тевензэ седе товгак. Андрей Куторкин – эрзянь содавикс сёрмадеесь кадсь редявикс тешкс эрзя-мокшонь литературань касомасо-кепетемасо. Тиринь ёнксонзо, Чувашиянь Порецкой райононть, сон эзизе стувтне зярдояк. Сеедьстэль тесэ инжекс. Ломантнеяк свал вастсть Андрей Куторкинэнь паро мельсэ. Буень эрицятнень сёрмадеесь ловсь тиринь ломанекс. Седейшкава кортниль мартост, кунсолыль стакачидест ды кенярдомадост. Неень шканеяк сермадейдеенть а стувтнить. Сонзэ лемга тедиде ютавтозель «Эрзянь вайгель» регионъютконь пелькстамо, конасонть эйкакштнэ ловность произведениянзо, истя жо алтасть тензэ эсест сермадовксосткак. Сёрмадомань тевентень Андрей Куторкин кундась 18 иесэ. Литературань кинть лангс арамо тензэ лездась тонавтыцясь Анна Караваева. Се шкастонть ушодыця сёрмадыцянть лемесь появась Алатырень уездэнь «Трудовой газетасонть». «Деревенские» – истя лемдязель васенце очеркезэ. «Красная звезда» газетасонть лиссть прозань лия произведениянзо. Ловномакудонь прявт, председатель, редактор, прявтредактор, сермадеень вейсэндявксонь прявт- весе тевтнень ветямосо Андрей Куторкин невтизе прянзо кода виев, кеме ломань. 1941-це иестэ лиссь «Ламзурь» поэмазо. Теманть тензэ ёвтызе сёрмадеень васенце промкссо Максим Горький. 3 иень ютазь, сонзэ коряс сёрмадозь эрзянь васенце оперась «Несмеян и Ламзурь». «Раужо палмань» историко-революционной роман, «Покш ки лангсо умарина» валморосо сёрмадозь роман, «Лажныця Сура» колмо книгасо роман! Сеть ломантне, кить явить мель раськенек литературань тонавтомантень, тешкстыть, Куторкинэнь сёрмадовксонзо лангсо кайсь аволь вейке раське! Юбилеень тешкстамга, Мордовиянь Раськень сермадеенть лемензэ ледстнить Мордовиясо, Чувашиясо, Московсо ды весе сеть ужинетнева, косо эрить раськенек ломанть, конатненень Андрей Ёндолонь шкинемазо пек малавикс, чарькодевикс ды вечкевикс.