Огарёв лемсэ МГУ-со ютасть научно – педагогической ловномат, конат тедиде алтавсть Андрей Куторкинэнь – Мордовиянь раськень сёрмадеенть чачома чистэнзэ саезь сядо кемень иетненень. (ЭРЗЯ)
Сёрмадомантень ёрокчинть 18 иесэ цёрасонть редизе Ульяновскоень совпартшколань тонавтыцясь Анна Караваева. Се шкастонть Андрей Куторкинэнь лемезэ уш вастневсь уездэнь кулялопасо. Тонавтыцянть лезксэнзэ вельде ушодыця сёрмадыцясь печаты ёвтнеманзо Московсо. Сестэ сон лиси Ёндол лемполавксонть ало. Андрей Куторкин васенцекс ушодызе эрзякс стихсэ романонь сермадоманть! Те эскельксэсь макссь покш топавтовкс литературанок касомасо-кепетемасо! Эсь произведениятнесэ сон а колы раськень койтнень ванстоманть. Тешкстама, кой-кона сёрмадовкстонзо ламот а содыть! Михаил Ломшин — педагогикань наукань докторось, профессорось Андрей Куторкинэнь шкинеманзо тонавтнемантень явсь покш мель- тень коряс сон сёрмадсь диссертация. Важодемань юрсо аштесть сермадеенть марто вастовоматне, улиця документтнэ ды произведениятне. Ёвтама, Куторкинэнь архивень сатышка пельксэсь ёмавтозель. Секскак, мезесь ули — те литературанок туртов покш сюпавчи. Сёрмадомантень вечкеманть сон кандызе эрямонзо перть! Содавикс кода рецензент. Косо аволь важоде, свал сонсь топавтыль весементь парсте ды видестэ, кармавтыль тенень лиятненьгак. Ломанень вечкиця, свалшкане лездыця, превспутыця, икелев ванныця- истямокс ледстнить Андрей Куторкинэнь раськензэ, ялганзо. Чувашиясо чачозесь, сон кеместэ сюлмизе эрямонзо Мордовиянть марто. Шкась невтизе, кодамо а онкставишка путовкс тейсь сермадыцясь раськенек эрямопингес. Содазь, «Раужо палмань» романось, «Лажныця Сура» романось -трилогиясь, ды лия произведениятне совасть эрзянь-мокшонь ды целанек масторонок литературань сырнень фондс! Ловноматнес пурнавозтне тешкстыть, истят промкстнэ кандыть покш лезэ ушодыця филологтнень содамочист кепетемга ды сюпалгавтомга.