Мордовиясо ютась «Раськень озкс» республикань национально-фольклорной покшчи. (ЭРЗЯ)

Теевемс содавиксэкс эрзянь культурань ды эрямопингень ушодкстнэнь марто, неемс эсь сельмсэ раськенек вельмевтезь кезэрень койтнень! Озксонть ушодомадонзо икеле Тамара Куприянова ялганзо марто вейсэ капши кенеремс ванкшномс декоративно-прикладной ды изобразительной искусствань мастертнэнь важодевксэнь весе невтематнень. Башка мель — Тимофей Тиминэнь книганзо презентациянтень, конанть ютавтыть «Эрзянь вайгель» вейсэндявксос совицятне. Евтама, весе литературась явшеви казнекс. «Истят покшчитне пек эрявить, васняяк, эйкакштнэнь ды од ломантнень туртов», — тешксты Самара ёнксонь эрицясь Тамара Куприянова.
Кода кезэрень шкатнестэяк, торамось терди покшчинь инжетнень мааронтень, эрзятнень туртов ине таркантень. Тюштядо морось ды лайшематне каявить паксянть келес! Те виев вайгельксэсь киньгак а кады мельтеме. Штатолонь кирвазтемась — кода раськенек вейсэндямонь тешкс, покштятненень-бабатненень озксось-пшкадемась- кода шкань ды раськень сюлмавомань тешкс!
Кезэрень шкатнестэ ютавтовиця озкстнэсэ эрзятне вешсть Инешкипазонть шумбрачиде, сюронь чачомадо, вешсть лезкс зыянов тевтнеде. Свал ледстнильть ине ломантнень лемест, конат кадсть редявикс тешкс раськенек эрямопингесэнть.
Вельмевтезь койтнень коряс, озномадо мейле, мааронть перька ветить кильдезь алаша. Чирьксэнть теемадо мейле, весе сыцятне каить мода, конань ускить тиринь ёнксстост. Вейсэнь кужось вейсэнди весе пурнавозтнень, мезесь максы ламо вийть ды раськенек ванстомадо покш кемема! Атянь эземсэ свал кортневильть тиринь келень ды культурань ванстомадо кевкстематне, ней те тевсэнть саеви мельс финнэнь-угрань лия раськетнень топавтовксосткак. Сетненень, кить тейсть покш путовкс тиринь келень ды культурань ванстомга ды кепетемга, Сюконямонь валт МР-нь прявтонть, Госсобраниянь, культурань ды туризмань министерствань пельде, национальной политикань коряс министерствань Шнамонь коневт! «Самодеятельной художественной творчествань народный коллектив» почётонь лемесь максозь «Рябинушка» Игнатбуень трудонь ветеранонь ансамблянтень. «Мордовиянь Заслуженной артисткакс» яволявтозь «Келу» ансамблянь солисткась Елена Воронина.

 

Комментарии

Комментариев нет.

This blog is kept spam free by WP-SpamFree.

Главное сегодня