«Мордовия» ГТРК-сь тейсь покш эскелькс икелев! (ЭРЗЯ)

Весемасторонь телевидениянь чистэнть минек Гостелерадиокомпаниясь тешкстась покшчи. «Мордовия» ГТРК-со панжовсь студийной од комплекс. Васень чистэнть саезь коллективенек ушоды роботамо минек республиканть туртов лия енов а молиця оборудования вельде. Тынк туров, минек ваныцянок, ушодови вещания еще и «Россия24» информационной каналсонть. Поздоровонь ёвтамо сакшность республикань ды ошонь кирдивийтне ды ВГТРК холдингень представительтне. Меельце вейке пель марто иень перть «Мордовия» ГТРК-со ламо мезе полавтовсь. Истямо мельс састь инжетне а покш экскурсиядонть мельга. Музей, редакцият, монтажкат, мик кустематнеяк — весемесь евтни кулядо пештязь эрямодонок. Покш мель марто инжетне ваннызь минек креативной конференц-залонок. Музыка вельде мазылгавтозь холлонть пачк инжетне совасть одкстомтозь студийной комплексэнтень. Республиканть туртов те таркась лия енов а молиця ды ламо функциянь кандыця. Сон маштови кинозалокскак. Васенце картинась – кода весемесь теевсь. Республикань Прявтонть Владимир Волковонь кармавтоманзо коряс минек покш коллективентень поздоровт евтась Правительствань Прявтось. Владимир Сушков путсь питне аволь ансяк кода ваныця, но и кода хозяйственник. Инженерной инфраструктурась ды роботамо условиятне – пек парт. Московсто студиянь панжомо сакшнось региональной департаментэнь прявтонь полавтыцясь Андрей Никитин. Государственной собраниянть вельде «Мордовия» ГТРК-нь коллективентень сюкпрянь валт евтась Иван Москаев, региононь парламентэнь прявтонь полавтыцясь. А Петр Тултаев ошонь кирдивийтнень пельде евтась сюкпря проблемной репортажтнэнь кисэ. Теде башка минек ули телевизионной покш кудораськенек – те масторонь келес ВГТРК-нь филиалонь 12 тежат ломаньстэ аштиця коллективесь. Те чистэнть сынь кенярдсть минек марто вейэ. Шабра регионтнэстэ прявтнэ састь поздоровонь евтамо. Апак сёпо евтама, минек телерадиокомпаниясь путсь ламо вий, истямо технической ды информационной тевенть топавтомга. Виталий Калугин – Мордовиянь печатень ды информациянь министрась покш телеэксперт. Сонзэ стака дивавтомс техникасо, но «Мордовия» ГТРК-со топавтовиця тевтнень курокчись дивавты. «Вести 24», «Сияжар», «Туган Як» ды ламо лия мелень саиця проектт аноксты «Мордовия» ГТРК-сь ваныцянзо туртов. Од топавтовкстнэ дивавтьсызь ваныцятнень. Но сех покш казненть минь анокстынек тынк туртов, вечкевикс ваныцянок. Кадови ансяк аламодо полавтомс коенк, ней ванодо аволь ансяк Россия1, но и Россия 24 каналонть, эрьва чи 22 чассо.