Малькинскяй лувоматне. (Малькинские чтения) МОКША
Панжевсть комсь колмоце Малькинскяй лувоматне, койс коре, поэтть шачема велесонза — Кяшалса. Школань тонафнихне васьфтезь инжихнень кшиса и салса. Путомок панчфт Малькинонь бюстонцты, Саранскяйста делегациясь кулхцондозень иттнень стихонь лувомаснон и ванозе школьнай краеведческяй музейть. Илась поладовсь Атерь велеса Культурань Кудса. Омбоце кизось ни тяза кочксевихть поэтть творчестванц и мокшень моронь кельгиенза. Ламоцне саф инжихнень эзда лувозь эсь сёрматфснон, конац лемтьф минцень кяленьконди, шачема масторти. Малькинонди лемтьф выставка мокшень мазы щапне — сембось тя ёфси афкуксонь оцю праздникста, конац максы вийхть и оцю кенярдема райононь эряйхненди эсь содаф землякснон инкса. Аф стак тя васедемать эса учихть ломаттне кизоньберьф. Стихт, морот, кштимат – пцтай кафта част мольсь концертнай программась. Эсь маштомашиснон няфтезь кода содаф артисттне, стане и шабатне. Кажнайть васьфнезь и прважсезь лямбе цяпамаса. Илать аноклаенза надияфтсть васьфтемс Малькинскяй лувомаса и сай кизоть.