Кочкуровань райононь социальной объектнэде. (ЭРЗЯ)

Кочкуровань ёнксонь Семилей велень поселениясонть аволь умок понжозель культурань-юткошкань ютавтома куро. Те проектэнть анокстызь ды совавтызь эрямос Мордовиясо велень касомань федеральной программанть коряс, кона тевс нолдави 2014 иестэ саезь 2020-цес. Куронть ушодсть стявтомо 2014-це иестэ, а уш ие ютазь, сонзэ панжомо сакшнось Мордовия Республикань прявтось Владимир Волков. Объектэнть стявтомас ютавтозельть 105 миллионт целковойть. Кавто этажонь кудонть площадезэ 3500 кавонзазь метрат. Мазый, валдо кинозалсонть 191 озамо таркат. Ули кафе, фельдшерско-акушерской пункт, почта. Кезэрень кудоютконь кедьёнкстнэ муизь эсест таркаст теске жо улиця музейсэнть. Сатышка тарка явозь тесэ и сеть экспонатнэнень, конат кандовить Ине Отечественной войнантень. Мезесь пек вечкевь посёлкань эрицятнень туртов — те парикмахерскоень панжомась. Сакшныть тезэнь аволь ансяк черень нарамо, артомо, сакшныть мик мазый причёскань теевтеме. Те социальной центрась кармась меельцекс сеть объектнэнь ютксо, конат кепедезельть Семилейсэ. Седе икеле тесэ панжозель 90-нь таркас эйкакшонь кужось. Сонзэ посёлкань эрицятне пек учость. Ней тесэ зярыя группат. Истямо бассейна ули аволь весе ошонь эйкакшонь кужотнесэяк. Явозь сон кавтов: вейке пелькссэнть тонавтыть укшномо вишка группас якицятнень, седе серей ёнкссонть тонавтыть 6-7 иесэ эйкакштнэнь. Весе группатнесэ улить эрявикс кедьёнкст, налкшкеть. Эрьва группась пурназь неень шкань тонавтомань вешематнень кирдезь. Физкультурно-оздоровительной комплекссэнть ютко шкаст вечкить ютавтомо од ломантне. Улить тесэ зярыя секцият. Эйкакштнэнь спортсо покш изнявкстнэде кортыть кубкатне. Фоконть вакссо ули футболонь площадка, налксить тесэ ловонь прамс.

Комментарии

Комментариев нет.

This blog is kept spam free by WP-SpamFree.