Казнеть национальной журналистнэнень! (ЭРЗЯ)
Республикасонок тиринь кельсэ нолдавиця «Эрзянь правда» ды «Мокшень правда» газетатненень топодсть 95 иеть. Теде кортасть кругловой стувор экшсэ вастовомасонть, косо лембе валт васняяк гайгсть газетасо важодиця журналистнэнь туртов. Россиянь касомасо межнациональной ды межконфессиональной тевтне саить покш тарка. Весе мероприятиятнеде, конат сюлмавить Мордовиясо эриця раськетнень марто, сёрмадови республикань газетатнесэ, невтеви телевидениясо, кортави радиосо. 95 иетнень перть, зярс нолдавить «Эрзянь правда» ды «Мокшень правда» газетатне, сынст лопатнесэ сёрмадозель пек ламо. Нама, истят покшчитне а ютыть казневтеме. Национальной политикань министерстванть пельде «Раськетнень ютксо ояксчинь ванстомань кисэ медальсэ» казезельть «Мокшень правда» газетань прявт редакторось Иван Лушкин ды «Эрзянь правда» газетань корреспондентэсь Пётр Зиновьев. Почётной грамотат, Сюконямонь валт, сертификатт «Равось ояксчинь лей» этнокультурной экспедицияс ды ламо лембе валт ульнесть те чистэнть газетасо важодицятнень туртов. Теде башка газетатнень редакциятнень туртов сюконямонь валт ёвтазельть эрзянь ды мокшонь раськень регионъютконь обественной вейсэндявксонть пельде. Сонзэ прявтось Юрий Мишанин кеми — ояксчисэ эрямось поладови седе товгак.