Инсар ошень «Солнышко» идень садса етась семинар воспитательхненди (В детскому саду «Солнышко» города Инсара прошел семинар для воспитателей) МОКША
Тя семинарсь Инсар ошса кочксеви колмоце кизось ни. Сашендыхть тяза Евсевьевонь лемса институтонь дошкольнай и начальнай образованиянь кафедрань педагокне, Саранск ошень и республикань райоттнень эзда идень садонь воспитательхне, конат содасазь и корхтайхть мокшень и эрзянь кяльса, вятихть эрь кодама занятият емлатнень мархта. «Финляндия – Россия» обществать лезксонц вельде пуроптф «Финно-угорскяй кяльхне идень садса и семьяса» од проектсь. Инсарда башка омбоце площадкакс арась Ардатовскяй районць. Полань-полаз кочксевихть тяза и тоза педагокне и воспитательхне. Тя проектти оцюнякс кочкаф финонь ученайсь Йоуни Сиркия. И маластонь пингть Мордовияста делегациясь тяка жа таколфты кизефкснень мархта моли Финляндияв. Инсар ошса семинарть работанц мельге ванць Сиркия. Сонь мархтонза пуромфне корхнесть скайп вельде.
«Солнышко» идень садса вятеви мокшень кяльсь. Кафта воспитательхне етафнихть эрь кодама занятият емлатнень мархта, тонафтыхть эсост кяльть содама, кштихть, морайхть, азондыхть стихт. Воспитательсь Татьяна Демкинась няфтсь инжихненди старшай группаса «Инжикс вели Алда бабань шири» занятиять. Сон содафтозень шабатнень кудонь жувататнень мархта, конат няфневсть экранца. Тяда башка, Татьяна Николаевна азондсь перень серотнень колга, кизефнесь эсост, мезе эряви, штоба пидемс кой-кодама ярхцамбяльхть. Няевсь: рузонь иттне пяк лац маштыхть мокшекс валхнень азондома.
Тяда башка, семинарса тисть доклатт ширеста саф воспитательхне и пединститутонь педагокне. Няфтевсть мастер-класст, коса примасть участия саф инжихне, анокласть сюреста няка. Пуромксса ульсть Инсарскяй райононь оцюнять полафтыец Александр Пронин и райононь социальнай тевонь коряс управлениять оцюняц Рауф Долотказин. Меколи сембе марса корхтасть и азозь мяльснон «Солнышко» идень садса няйфть колга.