АЧС-сь Мордовиянть вакссо! (ЭРЗЯ)
Тувонь африканской чумась Мордовиянть вакссо! Вирусось муезь Чувашиянь Порецкой районсо. Уш ковонь перть масторонок келес роботыть ракшань трямодо-кастомадо од правилатне. Ансяк вана личной подсобной хозяйствасо сынь а топавтовить. Саемга, Раиса Серолапкина кирди тувот эрямонзо перть. Ансяк вана АЧС-нь эпидемиясь кармавтызе сонзэяк топавтомс од правилатнень. Сынст коряс ярсамопеленть эряви анокстамс ансяк тол лангсо, кодаткак шукшт кадомс а мереви. Кирдемс ракшатнень эряви вельтязь, башка таркасо, аволь кардазсо. Совамскак ваксозост мереви дезинфекционной процедуратнень топавтомадо мельга. Тесэ топавтови ансяк вейке тевесь – андомась. Бути а топавтомс кармавтоматнень — сестэ зыян кандови аволь ансяк эстеть, но и весе велень эрицятненень ды мик республикантеньгак. Бути велесэнть кулы хоть вейке туво, сестэ велень келес сави маштомс весень. Кардазтнэнь жо сави пултамс. Бути тувось кулы кодамояк тувталтомо, сестэ эряви топавтомс вана мезе: а тердемс варштамонзо шабратнень, учомс врачт, ковгак а якамс ды кудоскак киньгак а нолдамс. Бути те кармавтомась а топавтови, сестэ истожавить весе тувотне 10 вайгельпень радиуссо. Республикань прявтось Владимир Волков пштистэ ваны шабра регионтнэсэ молиця тевтнень мельга ды пшкади парсте арсемс сеть фермертнэнень, конат а бажить лоткамс тувонь трямодо. Республикань Правительствась пшкадить ломантненень а кирдемс тувот. Кочкамс кодаткак лия ракшат, те тевенть топавтомга фермертнэнь туртов кармить явовомо субсидият.