Республикать столицаса етась «Шумбрат, Мордовия!» народнай творчествань Республиканскяй 19-це фестивальть Гала-концертоц (В столице республики прошел Гала-концерт 19 Республиканского фестиваля народного творчества «Шумбрат, Мордовия!») МОКША
Пцтай кафта кофт республикань главнай сценаса няфнезь маштомашиснон Мордовияса асу морайхне и кштийхне. Эрь районти максфоль ши, мзярда синь лисендсть сцена лангс концертснон мархта. «Шумбрат, Мордовия!» фестивальсь салсесыне ваныхнень и кулхцондыхнень мяльснон вов ни 19 киза. И фалу – васенце кизоста сявомок и тячиень шити молемс – ваныда сняра, што марьти прамс аш коза. Тядде етафтовсь народнай творчествань фестивальсь Мордовиянь Оцюнять лезксонц вельде. Еткшиста Культурань Республиканскяй Дворецса ульсь фестивальть гала-концертоц.
“Шумбрат, Мордовия!” фестивальса эрь районць старандай няфтемс сянь, мезьса сон козя культурань ширде. Декоративно-прикладной творчествань выставкась корхтай сянь колга, што Мордовияса маштыхть аф аньцек кштима-морама, но и цебярьста покодема.
Республикань Оцюнясь Владимир Волков мярьгсь, што тядде тя фестивалень участникокс арасть 95 тежянь ломань, лиякс азомс, республикань эрь 9-це эряйсь. Сонь валонзон коряс, самодеятельнай артисттне тиендьсазь семботь, штоба ванфтомс национальнай культурать, койхнень и обуцятнень, а инь главнайсь – семботь тянь пачфтемс оттненди.
Сценать лангса кштисть-морасть однек-сиренек. Народнай и тячиень пингонь эстраднай морот рузонь,мокшень, эрзянь и татаронь кяльса кайгсть сцена лангста.
«Шумбрат,Мордовия!» фестивальсь кунара арась афкукс народнайкс. Тянь колга корхтай ся, што гала-концертсь няфневи кафксть. Эсонза кафта отделеният, сценать лангса няфтьф 55 номер. И мольсь сон 5 частт! Сцена лангса финалса няфтезь маштомашиснон 900 лама ломань.
«Шумбрат, Мордовия!» народнай творчествань фестивальста ушедозь киснон ламоц минь артистоньке. Республикань Оцюнясь лятфтазень Илона Соломоновать и Владислав Шумкинонь,конатнень лемсна и вайгяльсна мекольдень шитнень кайгихть Россиянь центральнай каналхнень эзда. И кода фалу, гала-концертса азовсть сятнень лемсна, конатне 2015-це кизоня народнай творчествань ширде арасть инь цебярькс республикаса. Васенце вастть тядде явозь кафта райоттне – Ковылкинскяйсь и Лямбирскяйсь, а инь цебярь декоративно-прикладной творчествань выставка няфтсь Темниковскяй районць. Тяда башка, максфтольхть “Культурань Заслуженнай работник” лепт, Мордовия Республикань и Госсобраниянь Почетнай грамотат, благодарностть, специальнай казнет и диплопт сятненди, кит прянек-сединек эряйхть культураса и культурань инкса.