«Равось – ояксчинь лей» фестивалень делегациясь путсть цецят Михаил Девятаевень калмонззо лангс. (ЭРЗЯ)
Неть читнестэ прядовсь «Равось – ояксчинь лей» раськеютконь этнокультурной 16-це экспедициясь-фестивалесь. Вете чинь перть сонзэ участниктне ульнесь зярыя ошсо, косо эрить минек раськень ломанть. Эряви тешкстамс – те иестэнть экспедициянть алтызь Советской Союзонь Героенть Михаил Девятаевень чачома чистэнзэ 100 иень топодемантень. Экспедициянь делегацияс те иестэнть совасть 70 ломанть ды кода свалгак те аволь ансяк Мордовиянь эрицят. Фестивалень участниктне «Алексей Толстой» теплоходс озасть Самара ошсо. Умок ладявозь коень коряс, ильтясть сонзэ Самарань общественной вейсэндявксос совицятне.
Весе читнень перть, зярс теплоходось ютась Нижний Новгородов ды мекев Самарав, конференц-залсо мольсть семинарт, симпозиумт. Казаньсэ делегациясь ульнесь Советской Союзонь героенть Михаил Девятаевень калмонзо лангсо. Паро мельсэ вастызе участниктнень героенть церазо Александр Девятаев, кона ёвтнесь тетядонзо, Мордовияв сакшномадост.
Нижний Новгородсо экспедициянть вастызь ошонь куншкакуросонть. Те ёнксонь фольклорной коллективтне анокстасть аволь покш концерт. Чебоксар ошсо экспедициянть вастызь леень вокзалсо. Моро марто участниктне ютасть ошонь куротнева, ванызь «Город Мастеров» выставканть, ульнесть Чувашиянь раськень музейсэнть.