Раськень теварсевсктнэ аватненень лездыцякс (эрзя)
МР-нь экономикань, микшнемань ды предпринимательствань министерствась «Мой бизнес» куншкакуронть марто вейсэ поладыть лезксэнь максомо региононь предпринимательтненень. Истя, «Вишка ды средней предпринимательства» раськень теварсевксэнть кувалт, Мордовиясо юты «Мама-предприниматель» авань предпринимательствань кирдеманть коряс коень федеральной программа. Федеральной программань анокстыцякс, региононь эскельксэсь конань юты «Мой бизнес» куншкакуросонть, ашти Россиянь Минэкономразвитиясь. Пелькстамонь региононь эскельксэсь ушодови Сарансо таштамковонь 23-це чистэ ды прядови таштамковонь 27-це чистэ. Вете чинь перть тренингесь-интенсивесь карми аштеме пелькстыцятнень бизнесэнть коряс мельтнестэ-арсематнестэ, финансонь невтевкстнэнь ловомань, финансонь лувонь ды бизнес-планонь анокстамосто. Прявт эскельксэсь – бизнес-теварсевксэнь пелькстамось, косо экспертэнь жюрись максы питне экономикань кемекстамонтень, лия ёнов а молеманьчинтень ды социальной питнечинтень. Цётамга региононь сех вадря теварсевксэнтень максови 100 тёжат целковойс грант.
«Мама – предприниматель» программась тееви седеяк вешевицякс.
Ансяк ютазь иестэ минь пурнынек 5 тёжат яволявтомат, весе тректненень мелень явицякс кармасть 3,5 тёжат ават, грантонь лезксэнь максомась малавгадсь 10 миллионс целковойс, ещё 5 миллионт целковойть ютавтозельть кирдемас», — тешксты теварсевксэнь арсицясь, РФ-нь экономикань кастомань министрань полавтыцясь Татьяна Илюшникова
Программасо мелень явомас тердевить 18 иес эйкакш марто аватне, эйкакш мельга ванномасо аштиця аватне, истяжо аватне-эйдекс саицятне, опекунтнэ, попечительтне ды аволь тиринь аватне.