«Пурнатано васенце классос» покшчи (эрзя)

Сарансо Масторонь ванстыцятнень эйкакштненень казсть васенце классов молицянь кочкавкст.
Течи «Масторонь ванстыцят» региононь фондонь филиалсо ютась «Пурнатано васенце классос!» эйкакшонь покшчи. Те сёксестэнть васенце классос Сарансто СВО-со улицянь туить 43 эйкакшт.
Эйкакштненень макссть кочкавкст, конатнес сови весемесь, мезе эряви сыця тонавтницятненень тонавтнемасо – тетрадть, ручкат, гуашь, карандашт, альбом. Весемезэ — 42 позицият.
«Мон бажан, штобу тынь содавлиде: тынк тетянк – алкуксонь откерть! Минь акирдема марто учотано фронтсто сынст самост. Ковонь ютазь тынк туртов, пакшат, ушодови од, школань эрямось: мазый ды мельс туиця. Саеде саевкс тетянк-аванк – минек Масторонь алкуксонь вечкицятнень пельде!» — тешкстызе МР-нь Правительствань Прявтонь васенце полавтыцясь Галина Лотванова.
Истяжо эйкакштненень анокстасть анимациянь программа. Сынст кенярдовтсть эрьгелиця аниматортнэ ды покш сэрьсэ някатне, аквагримесь, попкорнась ды ламбамо ватась.
«Минек кудораськетненень прявт таркасо ашти государстванть пельде мелявксонь марямось. Ды те кемевикс нежекс миненек ашти «Масторонь ванстыцят» региононь фондось. Ним корты, што фондонь важодицятне свалшкане сюлмавомасот, терднить мероприятиятнес, лездыть тевконёвтнень марто. Минек малавиксэнек алкукс марить, што сынь – откерень кудораськеть!» — ёвтась каршо валсо васенце классов молицянь тетязо, спецоперациянь ветеранось Сергей Горьков.
«Артисттнэнень, пелькстамотненень ды казнетненень эйкакштне кенярдсть. Мельс паросо неемс сынст уцяскав чамаст. Курок тонавтомань кедьёнкстнэ максовить буетнестэ пакшатнененьгак. Минек ванстыцятнень кудораськетнеде мелявтомантень явтано башка мель. Содатано, кода эряви цёратненень марямс кудосто кирдеманть», — тешкстызе Артём Здунов Мордовиянь Прявтось.
Весемезэ Мордовиясо васенце классос молить Масторонь ванстыцянь 123 эйкакшт.