Мордовиясо комсь кавксовоцеде ютась «Велень озкс» национально-фольклорной кенярксчись. (ЭРЗЯ)
Перть-пельксэсь совавтсь полавтовомат сонзэ ютавтомань лувонтень. Васенцеде озксось ютась аволь Ташто Кшуманця велесэ, а Покш Игнатовань куншкакуросо. Кшисэ ды медьсэ вастыть весе инжетнень покшчинь анокстыцятне. Весе, мейсэ сюпав Покш Игнатбуесь – анокстазь невтематнесэ. Тесэ жо ютыть мастер-класстнэяк. Александр Смирнов теи чувтонь пенч, конас, цёранть валонзо коряс, канды паро мельть-арсемат ды шумбрачи. Ёроков кедь ломанесь видьксты – сон свал анок невтемс вечкевикс тевень салавачитнень. Раськень ярсамопельтне – кенярксчинь тешкстнэде вейке. Эрзянь каймак, брага, пачалксеть ды мик свадьбань пряка. Сонзэ эйсэ каванить одирьвань раськетнень. Торамась, кода и кезэрень шкатнестэ, пурны весень озксос. Кирвастезь штатолось ды Инешкипазонтень пшкадемась – озксонь еще вейке а полавтневиця тешкс. Тиринь келень ванстомань тевсэнть топавтовкстост ды покшчинть эрявиксчидензэ кортась Покш Игнатовань райононь прявтось Татьяна Полозова. Шнамонь конёвт ды Сюконямонь сёрмат Республикань Госсобраниянть, Правительстванть, культурань ды национальной политикань министерстванть пельде весеменень, кие теи покш путовкс тиринь келень ды культурань ванстоманень. «За любовь и верность» медальсэ казезь Покш Игнатовань образцовой кудораськетне. Пизементь лангс апак вано республикань национально-фольклорной кенярксчинь инжетне Россиянь ламо регионсто ды омбо-масторсто чопавтсть эрзянь раськень морамонь культурантень.