Мезьса эряйхть тяниень пингть Мордовиянь од ломаттне? (МОКША)
Сембонди содаф, што од ломаттне – тя странать сай пингоц. Афкукс, синь эряфснон коряс ушеды вииякшнема экономикась, культурась, спортсь и лама лия направлениятне. Кодамот минь Мордовияса тяниень пингонь од ломаттне, кодама арьсемат прясост синь шарондыхть и кодама тевса синь покодихть тячи? Каршевалть содасаськ «Тиф Мордовияса» интернет- изданиять журналистонц, Огарёвонь лемса МГУ-ть филологическяй факультетть магистронц Елена Лашмановать кядьста. Тевфтома стирсь аф ащекшни мъзярдонга, якай ялганзон мархта эрь кодама форумс, вяти «Храмы Мордовии» проект, тиенди ожнаняста мазы узорхт. «Тиф Мордовияса» сайть эса, конань лангса сон покоди, лама мялень салай статьяда и тяса оцю путфксоц мокшень стирть. Пяк кеняртьфти, што тяниень пингть лама од ломаньда шарфнихть мяль эсь кяльснон ванфтомати. Елена Лашмановась эряй Саранск ошса, но мокшень кяльсь фалу мархтонза и университетса тонафнемац станя жа сотнефоль тядянь-алянь кяленц мархта. Покодема вастонц колга корхтай палы сельмоса. И сембодонга мяль салай ся, што марнек мезе сон тиенди – сембось эсь республиканц касоманц и вииякшнеманц инкса. И тя тевса сонь ули лама лездыенза.