Койхнень ванфтомасна, культурать виияфтомац и од ломаттненди шачема-касома кяльть аф юкснемац – тяфтама арьсемаса эряйхть Рузаевскяй райононь Левжа мокшень велеть эса. (МОКША)

Велесь ащи пяк мазы вастса, фкя ширесонза няеви келуналсь, а омбоце видесонза– пефтома паксятне и фкя лемса шуди ляйсь. Тяфта жа Левжась содаф  лама марлювонзон мархта, конатне эрь кизоня макссихть оцю урожай. И аф аньцек тя мархта козя велесь. Сембодонга пяк велеть эса шарфнихть мокшень культурать ванфтоманцты. Ёфси аф кунара Левжаса строясть од мазы культурань куд, конанц эса ётафневихть эрь кодама оцю концерт. «Ару лихтибря» морай коллективсна содаф лама вастса, гастрольсна ётнихть Россиянь пъцтай марнек регионца. Сембе тя пара тефне велень эряйхненди удалсихть сяс, мес ломаттне покодихть марса и тевонь кельгикс.  Аф лядендыхть ширети и од ломаттне. Мазы мокшень стирсь Татьяна Канаевась  марнек россиянь и лия масторонь конкурсонь лауреат,  Глинкань лемса Нижняй Новогородонь государственнай консерваториянь тонафни. Эсь шачема вастонц и кяленц  мъзярдонга аф юксенсы. Фалу сашенды эсь веленцты, лезни тядянцты  велеса культурать виияфтоманцты. А мъзярда стирсь тушенды кудста ошу, сон пяк лажачни куду  и тя пингть севонцы кядезонза баянть и морай мазы мора «Арьсемат мордовиять колга», конань тяштезе сонць.Пяк пара ся, што культурань кудть васенце руководителец Раиса Лоскутовась лезни сембе тевса и тяниень пингть. Сон казьфоль МР-нь Заслуженнай  культурань покоди лемса. Кайги и мазы вайгялец мокшень моронь морамста кулеви пъцтай марек Левжать къвалма.Велесь кармай эряма, сяс мес улихть тяфтама тевонь кельги ломатть, конатне каннесазь марнек велень эряйхненди  минцень мокшень культураньконь, сявмок  ёмла иттнень эзда  и аделавомок сире ломаттненди.