«Эрямо тарка ды ошонь эрямо кой» раськень теварсевксэсь (эрзя)

Краснослободскойсэ одкстомтови ведень максомань лувось. «Эрямо тарка ды ошонь эрямо кой» раськень теварсевксэнь «Ванькс ведь» региононь проектэнть лувсо важодематне ушодовсть 2024-це иень даволковсто. Теварсевксэнь топавтомас явозь 57 миллиондо ламо целковойть. Краснослободскойсэ ведень максомань сеттнень кувалмост 38 вайгельбеть. Теде башка, ошсонть важодить ведень тулкадиця 5 кевмарт ды домка мода потмонь 6 варят. Тевс куватьс шкань перть нолдамонть эйстэ ошонь ведень максомань лувось таштомсь. Одкстомтомась топавтсы улиця сеттнень андоманть, човорявкстнэнь эйстэ ведень ванськавтоманть ды сонзэ эрявикс покшолмасо ванстоманть. Важодематне ютыть К. Марксонь ды Ленинэнь куротнева. Путозь магистралесь лезды шождалгавтомс ведень максомань уликс сеттнень ды максомс ошонь эрицятненень симемань паро веденть.
«Теварсевксэнь топавтоманть лувсо моли 110 миллиметрань диаметрасо 2 645 метрас ведень максомань сеттнень путомась. Теде башка, стявтови ведень ванськавтомань станция, 80-нь кубометрас ведень тулкадиця кавто кевмарт, 50 кубометрас таштавомань кельгемачить, дизелень электростанция, санитарной ванстомань таркань пирявкс ды кеме вельтявкс марто ардомань ки», — тешксты Краснослободскоень ошонь поселениянь администрациянь прявтось Николай Трунтаев.
Неень шкасто стявтомась топавтозь 50 проценттэ ламос. Ленинэнь курованть стявтозь кавто кевмарт ды таштавомань кельгемачи. Ленинэнь, К. Марксонь ды Чапаевень куротнева турбань путомань важодематне топавтозь пес.