«Армия-2024» военно-технической форумось (эрзя)
«Патриот» Москов ёнксонь военно-патриотической парксо течи прядсы важодеманзо «Армия-2024» военно-технической форумось. Невтемасонть — оршамонь, леднемань ды военной техникань 28 тёжадо ламо невтевкст. Форумсо важоди Артём Здуновонь прявтсо Мордовиясто делегациясь. Республиканок инжетнень прявт тевекс кармасть регионъютконь сюлмавоматнень кемекстамось, военно-промышленной комплексэнь покш предприятиятнень марто вейсэнь важодемадо кортамось. Истя, «Камазонть» марто кортнезель заводонь шассинть лангсо «Верстакофф» ремонтонь усксевиця мастерскойтнень тевдеемась-нолдамось. Судостроениянь ды судоремонь технологиянь куншкакуронть марто кортнезь важодемс кооперациянь кевкстематнень коряс. Теде башка республикасо вейсэ арсеви ютавтомс Поставщикень, лиякс меремс, Ускицянь-миицянь чи. Судостроениянь вейсэндязь корпорацияськак арси кирдемс сюлмавомат Мордовиянь зярыя предприятиятнень марто. Иневенчтнень теемстэ улить башка зярыя вешемат. Секскак минек тевдеицятне арсить весементь топавтомс парсте. Улить вейсэнь кортамот Иневедень приборостроениянь корпорациянть марто. Тесэ эряви тешкстамс цифрань ды информациянь технологиятнень. Маласо шкасто карми домкасто арсезь Ускицянь-миицянь чинь ютавтомась. Теке марто кастовить кооперациянь сюлмавоматне «Тактикань ракетань вооружения» корпорациянть ды «Росэлектроника» холдингенть марто.