Ульяновск ёнксонь Павловань округсо Ташто Пичеур велес совиця Холстовка велень школань 2-це корпуссо ютась ледстнемань вастовома (эрзя)
Школасо историянь ды краеведениянь музеентень максозь Александр Бурлаков эрзянь келень тонавтыцянть лемесь. Александр Павлович Бурлаков тусь эрямосто те иень эйзюрковсто. Музейсэ ванстовить эрзянь раськень оршамопельть, эрьва кодат ули-парот ды ламо лия мезе. Весемесь ледстни седе, кода парсте эряви ванстомс эсь раськенть ундоксонзо, тиринь келенть, культуранть ды койтнень-кирдатнень.
Историянь ды краеведениянь музеесь панжозель 1985-це иестэ ды вети сюпав эрямопинге.
Школасо тонавтыцятнень ютавтовиця покш важодемаст вельде музеесь од краеведтнэнь туртов теевсь тиринь масторонь вечкемань кушкакурокс. Александр Бурлаков ламо иеть ветясь музейсэ тиринь эрзянь келентень кастомань вечкеманть. Промксонь инжетнень ютксольть – Анна Мочалова Павловань округонь прявтось,
Владимир Софонов Ульяновск ёнксонь эрзянь ды мокшонь раськень ды культурань вейсэндявксонь прявтось, Ирина Матюнина Тонавтомань кастомань институтонь этнокультурань куронь ветицясь, Александр Бурлаковонь малавикс раськензэ ды лият. Теке марто вастовоманть лувсо Холстовкань ды Ташто Пичеуронь школатнесэ эрзянь келенть ды литературанть кастомга ютавтозель региононь семинар.