Ютазь оймсема читнестэ республикань кавто районтнэ тешкстызь эсест покшчист. Ицялонь ды Покш Игнатовань райононь прявт куротнесэ шкинемаст невтизь кедьчелькев ломантне, эрьва велень поселениясь пурнакшнось выставка. (ЭРЗЯ)

Покшчитнес сакшнось РФ-нь Государственной Думань депутатось Виталий Ефимов. Ичалкань прявт куросонть сон ваннызе пурназь выставканть. Мелезэнзэ тусть райононь кедьчелькев ломантнень теевксэст. Седе ламо мель явсь од ломантнень робототехникань коряс выставкантень. Седе тов вастовомась ютась од ломанень центрасонть. Райононь эрицятне кунсолызь депутатонть программанзо, конань марто сон карми молеме седе тов. Виталий Ефимов ёвтась райононь эрицятненень сюкпря кисэнзэ аштеманть кисэ. «Велень территориятнень кастомань» программанть лувсо районсонть кепедезь 198 кудот, 35 кудот уроз эйкакштнэнь туртов, 114 кудораськеть совасть од кудос аварийнойстэ. 371 сертификатт эрямо таркань рамамос максозельть Ине отечественной войнань ветерантнэнь ды сынст доваст туртов. Эрицятнень пельде ульнесть ламо кармавтомат. Малав весе сюлмавозельть китнень одкстомтомаст марто. Весе неть вешематнень эряви сёрмадомс конёв лангс. Скорой помощень машинат, пожарной техника, школатнень туртов автобуст — вана мезе эряви полавтомс маласо шкасто. Чинь омбоце пельксстэнть Виталий Ефимов вастовсь Покш Игнатовань райононь эрицятнень марто. «Аврора» культурань центрас сакшнось Владимир Литюшкингак, сон кирди вал Мордовиянть кисэ Федерациясь Советсэ. Тесэяк васень вешематне сюлмазельть берянь китнень марто. Но сех ламо кевкстематне кандовсть здравоохранениянтень. Районсонть пекстызь больницянть, эрицятне вешсть ламолгавтомс дневной стационарсо таркатнень. Зярыя ФАП-тнесэ арасть ормаменькст, а сынсь пунктнэ пек каладот. Депутатось тешкстызе, теде кортамось уш мольсь республикань Прявтонть марто. Андрейвелень эрицятне ёвтасть сюкпрянь валт кандидаттнэнень, культурань кудонь витнеманть кисэ. Ледстясынек, тосо ютыть республиканок келес вейкине раськень театрань репетициятне! Эрицятне пшкадсь депутаттнэнь туртов келейгавтомс районсост банконь секторонть ды лездамс тепличной комплексэнь стявтомасо, конань кепедемадо мейле районсонть кармить од важодема таркат