Юрий Кузнецовонди лемтьф ила (МОКША)
Тядде топодсь кафксогемонь кизот Юрий Кузнецовонь шачема шистонза. Содаф мокшень писательсь, аф ваномок нюрьхкяня эряфонц лангс, кенерсь нолдамс аф кржа книга. Лятфтамс творческяй и эряфонь кинц колга кочксевсть Пушкинонь лемса национальнай библиотекаса сят, кие содазе Юрий Кузнецовонь, вузонь студенттне и преподавательхне. Юрий Кузнецовонь азксонза и повестенза мялень салайхть сюжетонь ширде, драматическяй картинатне ащихть серцек авторть лирическяй мялензон-арьсеманзон мархта. Теенза эряфонь нюрьхкяня пингста удалась куцемс мокшэрзянь прозать инь вярдень тёкшезонза. Сон ульсь смузю критик, журналист и писатель. Од ломаттненди Юрий Кузнецовонь колга азондсть сят, кинь мархта сон тонафнесь университетса, работась. Синь лятфнесазь писательть аньцек цебярь ширде. Ламоттненди сон лездсь. Улема, кда Юрий Кузнецов афоль ту рана эряфста, сёрмадоль нинге лама цебярь произведения. Но и уликс творческяй козяшинц содаманкса, ётафневихть тяфтама илат.