«Время в пространстве» А.Рябовонь панжовсь выставказо. (ЭРЗЯ)
Саранск ошонь 4-це номер эйкакшонь художественной школасо ютась раськень мастерэнть, керсицянть Александр Рябовонь персональной выставказо. Алтызе сонзэ мастерэсь скульпторонть Степан Эрьзянь чачома чистэнзэ 140 иень ды эсензэ те школасонть важодемань 10 иень топодемантень. Сы иестэ Саранск ошонь 4-це номер эйкакшонь художественной школантень топодить 40 иеть. Те шканть перть тестэ лиссть ламо содавикс художникть. Ней тесэ тонавтнить малав 370 эйкакшт. Теде башка, школасонть ули ещё и «Цветики-семицветики» кужине, ков сакшныть 120 овсе вишкине тонавтницят. Александр Рябов те школантень сась важодеме кемень иеде теде икеле. Васенце стакачись, конань марто савь сонензэ вастовомс — те се, што тонавтомс керсеме ошонь эйкакштнэнь — тевесь седе стака. Велень эйкакштнэ вишка пингстэ саезь содасызь мезе истямось инструмент, ошонсетне теде кармить содамо ансяк керсемань уроксо. Занятиятненьгак Александр Рябов ушодсынзе материалтнэде ёвтнемасо, седе, кодамо чувто эряви кочкамс те эли тона композициянь анокстамсто. Те иесь мастерэнть туртов ульнесь пек сюпав эрьва кодамо выставкасо ды мероприятиясо. Ульнесь мик омбо масторсояк, лездась ютавтомс раськеютконь керсицянь фестиваль. Лиякс меремс — свал тевсэ, свал касы. Тень редизь выставкас сыцятнеяк. Нама, пек стака вейсэндямс мастерэнь ды педагогонь тевтнень, но Александр Владимировичнэнь те удалы, ды удалы пек парсте. Ламот тетятне-аватне бажить сёрмадстомс эйкакшост сонзэ классос. Икеле — певтеме творческой ки, конанть ланга молемс ламосо лездыть тонавтыцяст туртов тонавтницятнеяк. Кортыть, эрьва ёроков ломанесь, ёроков эсь ладсонзо. А зярдо сон те ёрокчинть ещё кази и тевентень мелень явиця эйкакштнэнь туртовгак — те лисьмапрясь зярдояк а машты.