«Владычной полкось» невтсь пря военно-исторической реконструкциясо. (ЭРЗЯ)

Эрьва кодамо исторической эпохань представительть вастовсть ве тюрёмань паксясо. Изборск ошсо ютась «Железный град» военно-исторической реконструкциянь фестивалесь. Те иестэнть вейс пурнавсть малав кавтосядт ломанть Санкт-Петербургсто, Псковсто, Туласто ды Саранск ошсто. Налонь пачк ятонть каршо моли рузонь ушманонь отрядось. Дружинниктне кекшить ваксар экшс ды таргить торост. Те тюреманть койтне аволь стакат, ятонть изнямга сонзэ эряви колмоксть вачкодемс. Налчирьке марто ушмантнэнень тесэ седе шожда. Бути налось весть понги ломанентень, тонась ловови маштозекс. Вейке отрядонь ушмантнэ изнязь. Изницятне кенярдыть ды прыть пильге лангсто сиземадонть. Ве шкане тюрить зярыя пингеть. Вейсэ аштить 13-це пингень Псковонь бояронь дружжинась, 14-це пингень Новгородонь ушкуйниктне, 15-це пингень Европань рыцарьтне ды 17-це пингень стрелецтнэ. «Владычный полк» Саранскоень клубось невтизе пурнавозтненень, кодат ульнесть стрелецтнэ, пушкартне, казактне ды истяк эрицятне 17це пингень Саранск ошсо. Зярс цератне тюрить, аватне эсест кошотнева анокстыть ярсамопель. Светлана Комиссарова тевс нолды ансяк куншкапингень книгатнестэ кезэрень рецепт.
Тесэ весемесь кирдезь кода эряви. Оршамопельтне анокстазь кезэрень шкань артовкстнэнь коряс. «Железный град» Россиясо сеть фестивальтнень эйстэ вейкесь, косо истя виевстэ ды велувсо невтевить эрьва кодамо пингень геройтне.