«Вейсэнь ундокст» фестивалесь ушодызе роботанзо! (ЭРЗЯ)

Кочкурбуень Вирь Тавла велесэ панжовсь «Вейсэнь ундокст» чувто ланга керсицянь раськеютконь финнэнь-угрань омбоце фестивалесь. Штатолонь кирвазтемась яволявтсь фестиваленть панжомадо. Икеле 5 чить, зярдо керсицятне кармить топавтомо эрямос эсест мелест. Удмуртиясто керсицянть Юрий Конюховонь мельс умок тукшнось вейке нусманя, но теке марто мазый ёвкс, конань ней сон топавтсы чувтосо. Удмуртонь легенданть коряс, ковонть лангсо раужо петнатне, те курся марто тейтерень сулей. Икеле сон эриль од ава марто, конась эрьва кода нарьгсесь лангсонзо. Весть телень якшамо вене сон кучизе тейтеренть ведьс. Ковось неинзе мазыйканть сельведензэ, ды саизе эстензэ. Се шкастонть саезь ковонть лангсо и неявить раужо сулейтне. Фестивалень ютатвтыцясь «Эрьмезь» Тавлань мастерэнь вейсэндявксось ды Кочкурбуень администрациясь. Ламот керсицятнень эйстэ аволь васенцеде састь минек масторов ды паро мельсэ кундасть арсемаст топавтомо. Анок скульптуратнень весе нейсызь фестивалень пекстамо чистэнть. Эряви ёвтамс, те иестэнть сон алтавсь содавикс фольклористэнть Йовлань Олонь 65 иень топодемантень.