Весероссиянь семинаронтень Саранскоев састь малав 500 ломанть РФ-нь весе регионтнэстэ. (ЭРЗЯ)

Россиянь Минсельхозось кочкизе Мордовиянть велень территориянь кастомань ды хозяйствань ветямонь вишка форматненень лезксэнь максомань весероссиянь семинаронь ютавтома таркакс. Весероссиянь семинарось юты Саранскойсэ умарьковонь 10-це чистэ саезь 12-цес. Региононь Прявтось Владимир Волков яволявтсь, што миненек ули мезе невтемс семинарс сыцятненень. Мордовиясо меельце иетнень перть кеместэ совавтовить эрямос велень социальной кастомань программатне, стявтовить эрямо таркат од кудораськетнень ды од специалисттнэнь туртов. 2016-це иестэ «Устойчивое развитие сельских территорий» программанть лангс арсеви ютавтомс 660 миллионт целковойде ламо. Тень лувсо совавтовить эксплуатацияс 20 тежат кавонзазь метрат эрямо таркат, кармить строязь газопроводонь 10 вайгельбеть, водопроводонь 45 вайгельбеть, прядови 150 таркас школань, 130 таркас эйкакшонь кавто кужонь, ФАП-нь, Культурань кудонь стявтомась. Истяжо Мордовиясо парсте ютавтовить хозяйствань ветямонь вишка форматненень лездамонь мероприятиятне. «Начинающий фермер» ды «Развитие семейных животноводческих ферм» программатнень лувсо панжовить од предприятият, роботамо таркат, кастови тесэ нолдавиця продукциянь ламочись.