«Велень озксось» 94-це номер эйкакшонь кужосо (ЭРЗЯ)

Эрзянь, мокшонь кельсэ ютавтовиця покшчитнень вечксызь аволь ансяк кужонь инжетне, но и сынсь эйкакштнэ. Аволь васенце ие тесэ важодить «Минь Мордовиясо эрятано» дошкольной образованиянь региональной модуленть коряс. Налксемань лувсо эрьва-кодамо раськень эйдетне содавтовить аволь ансяк тиринь кельтнень, но и культуранок марто. «Велень озкс» лиякс — «паронь пандома». Кезэрень шкатнестэ сёксень те покшчись лововсь прявт покшчитнень ютксто вейкекс. Секскак озксонь ютавтыцятне путсть ламо вийть койтнень невтемга, раськенек сюпав эрямопингенть содавтомга. Паксяванень, Ведяванень, Мастораванень ды лия пазтнэнень пшкадематнесэ кода икелеяк ванстови шумбрачиде, паро эрямодо, зыянонь ванстомадо вешемась. Мордовиянь заслуженной поэтэнть Рая Орловань сёрмадовксонзо коряс путозь коесь шождалгавтозель. Ёвтама, эйкакштнэ пек парсте налксизь ролест, прявт путовксось топавтозь. «Верьгиз ды нуицят» налксема, валморот, морот ды киштемат. Весе номертнэ мазылгавтызь анокстазь покшчинть. Инжетнеяк эзть кадово мельтеме. Аватне мельспаросо невтизь ёрокчист някань-кудонь ванстыцянь анокстамосо. Покшчись эзь юта казневтеме. Эрзянь, мокшонь келенть ды культуранть кастомга, кепетемга парсте топавтовиця важодеманть кис воспитательтне казезь Мордовиянь образованиянь министерствань, Э/М раськень регионъютконь общественной организациянь, Рав кужонь ф-у раськень культурань куронь сюконямонь валсо ды казнесэ. Кемевтимизь, истят покшчитне ды целанек важодемась национально-региональной компонентэнть коряс тесэ поладови.

Комментарии

Комментариев нет.

This blog is kept spam free by WP-SpamFree.