«Торамась терди!» (ЭРЗЯ)
Од бюстонь панжома, чувто ланга керсицянь регионъютконь 2-це фестивалень ютавтома! Владимир Ромашкинэнь чачома чистэнзэ саезь 65 иетненень алтазь покшчитнень цетамокс кармась улеме «Торамась терди» эрзянь кезэрень моронь фестивалесь. Сон ютась Кочкурбуень Вирь Тавла велесэ, косо меельце иетнестэ эрясь Йовлань Оло. 10 иеде теде икеле панжозь этно-кудосонть ульнесть тежат инжеть. Васенцеде ялгаст ды коллегаст тиринь ёнкссо- Эстониясто сету раськень ломанть. «Вейсэнь ундокст» чувто ланга керсицянь фестивалень цётамось — чувтонь 10 скульптурат, конат мазылгавтызь музеень парконть. Ялгаксчи ды вейсэндямо! Неть ёнкстнэ явить эрзянь кезэрень моронь фестиваленть лиятнень эйстэ. Кемекстазь коень коряс, сонзэ панжи «Торама» фольклоронь ансамблясь, кона кармась улеме Владимир Ромашкинэнь эрямосонзо сех покш топавтовксокс. Валдо ойме, паронь арсиця, тиринь культурань ванстыця! Истямокс сон кадовсь ломантнень оймесэ. Стакачитнень лангс апак вано,Владимир Ромашкин пурнась фольклоронь сюпав материал, масторонок келес раськетнень содавтсь эрзянь, мокшонь музыкань искусстванть ды ламо вайгельсэ морамонть марто. Ёвтама, маласо шкасто региононь прявтошонок куротнень ютксто вейкентень максови содавикс музыкантонть Владимир Ромашкинэнь лемезэ. Башка сюкпря -фестиваленть ютавтыцянзо туртов. Ансяк истя ванстови раськенек туртов сех питнеесь.