Темниковасо ютась эрзя-мокшонь вейсэндявксонь исполкомонь промкс (ЭРЗЯ)

Ванкшномс цётамотнень, муемс важодемань од формат! Федор Ушаковонь ине флотоводеценть тиринь ёнкссонзо ютась э/м раськень регионъютконь общественной вейсэндявксонь выездной заседания. Мордовиянь кезэрень ошсонть коень коряс инжетнень вастыть кшисэ-салсо, шумбракстнема вал марто пшкалить мокшонь, татаронь, рузонь кельсэ. Программань васенце тешксэсь- Ушаковонь лемсэ историко –краеведческой музеень содавтомась. Самай тесэ ванстовить лия ёнов а молиця экспонатт ды документт, конат сюлмазь Россиянь государствань эрямопингенть марто. Инжетнень валост коряс, те музейсэнть эряви улемс республиканок эрьва тонавтницятнень! Истят вастовоматне лездыть кастомс тиринь масторонь вечкиця ломанть! Промксонь ютавтомань таркакс Темниковань буесь кочказель а стяко, тесэ арсезель ветямс домка кортамот патриотизмадо. Нина Кулькова – вейсэндявксонь Темниковасо отделениянь прявтось тешксты, районсонть кассы-виевгады кадетэнь, поисковикень, юнармеецтнэнь движениясь, ветяви покш важодема армияв молемадо икеле од ломантнень марто. А кадновить ве ёно ветеранонь советнэяк. Редявикс тев тиринь масторонтень вечкеманть кастомасо топавты краснослободсконь епархиясь. Ялатеке, васенце тарксо те рисьмесэнть ашти кудораськесь! Ансяк вейсэнь, апак лотксе важодемань ветямось максы покш цётамот. Промксонть лувсо исполкомонть пельде яволявтозель республикасонок ковонь перть патриотизмань ды ломанень вейсэндямонь уроконь ютавтомадо пшкадема. Ковонь перть молиця патриотизмань уроктнень кирдизь весе пурнавозтне. Учови, васенце мероприятиясь юты Темниковань районсо. Тиринь масторонтень вечкеманть кастоманзо, тиринь культуранть ванстоманзо кис активистнэ казезельть ведомствань казнесэ! Теде башка, маласо шкастонть э\м раськень вейсэндявксось аноксты од тешкс- «Гордость нации» медаль.

Комментарии

Комментариев нет.

This blog is kept spam free by WP-SpamFree.