Течи тешкстави Умарень Спасось. (ЭРЗЯ)
Умарьковонь 19-це чистэ весе православной ломантне тешкстыть Преображение Господне покшчинть. Лиякс сонзэ еще лемдить Умарень Спасокс. Коень коряс церьковатнесэ светявтыть умарть. Кезэрень шкатнестэ светязь фруктатнень ломантне кадылизь церьковас, сынст седе тов явшилизь беряньстэ эрицятненень. Преображение покшчись моли Евангелиясо сермадозь тевенть эйстэ, зярдо Фавор пандонть прясо озномсто Пазось невтизе тонавтницянзо икеле алкуксонь чачонзо. Чамазо валдомс, прок чипаз, оршамопелензэ теевсть ашокс, прок валдо чи. Секс те чистэнть священниктне оршить ашо оршамопельть. Кода кортыть пазнэнь кемицятне, Умарень Спассто эряви аволь ансяк явшемс умарть, васняяк эряви бажамс полавтовомс паро ёнов.