Саранскоень православной духовной училищась карми семинариякс. (ЭРЗЯ)
Мордовиянь Прявтось Владимир Волков ульнесь Саранскоень духовной семинариянь Попечительской советэнь заседаниясонть, конась ютась Саранской ды Мордовской митрополитэнть Зиновиень прявтсо Республикань кудосонть. Прявтокс кевкстемакс чинь повесткасонть кармась улеме духовной училищанть, кона роботы Саранскойсэ 1997-це иестэ саезь, семинариякс теемазо. Владимир Волков пшкадсь Попечительской Советс совицятненень ды тешкстызе Мордовиясо духовной тонавтоманть эрявиксчинзэ. Светской ды духовной кирдивийтненень эряви вейсэ пештямс семинариянть. Шкань ютазь покш квалификация марто кадратне, конат анокставить те семинариясонть, кармить эрявиксэкс аволь ансяк Мордовиясо, но и сонзэ томбалеяк. Истяжо вастовомасонть ульнесь пурназь духовной семинариянь научно-методической виень кастомань ды кемекстамонь коряс комиссия. Почетной председателекс кочказь Зиновий Владыкась, а прявтокс – «Талина» агрохолдингень президентэсь Виктор Бирюков.