Саранск ошса кочксевсь «Морай шачема велесь» республиканскяй васенце фестивальсь. (МОКША)

Иласа няфтезь эсь маштомашиснон республикань кемсисемге райононь велень фольклорнай коллектифне. Перьфпяльге кайгсь музыка, кона марявсь ичкозтькиге, сон бта, сярьгядсь ошэряйхнень и фольклорнай коллективонь участникнень. Мазы тюсонь национальнай щапне, шамаса пеедематне, лама кяльса кайги моротне – сембось кепсесь мяль. Лама частт мельцек Пушкинонь лемса парксь арась менельть ала оцю концертнай залкс. Сценать эзда аф ичкозе пуроптфоль козя выставка, коса велень машты кядь мастярхне няфнезь эсь тиф паршиснон: котф ланга серматфсь, мазы някатне, конат щафт мокшень щамса. Ломаттне малаткшнесть, ванонцть эсонза, рамсесть мяльс туф налхкшт. Сценать лангс фкя-фкянь мельге лисендсть фольклорнай коллектифне. Эрявсь морамс эсь кяльса мора и няфтемс народцень эряфста кунардонь кой. Ломаттне аф весть васетькшнесть эрь кодама фестивальхнень эса, содайхть фкя-фкянь и тясовок арасть мала фкя дружнай музыкальнай семьякс, морасть мокшэрзянь, татаронь, украинань народнай морот, сиде моронят. Ошень эряйхне, сонь инжиенза и фестивалень участникне сявсть эстейст пара мяльхть тя моронь фестивальть эзда. Сембонди ульсь пяк весяла, азсть мяль, штоба поладоволь тя пара иалсь и сай кизотьке.

Комментарии

Комментариев нет.

This blog is kept spam free by WP-SpamFree.

Главное сегодня