Ромодановань районсо курок карми путозь Т.Бибинанень кеврунго. (ЭРЗЯ)
МР-нь народной художникесь, скульпторось Николай Филатов свал тевсэ. Ансяк прядызе Владимир Ромашкиннэнь бюстонзо лангсо роботамонть, сеске кундась лия тевс — теи крановщицанть, Татьяна Бибинань кеврунгонть. 1960 иень панжиковонь комсеце чистэ Татьяна роботась подъёмной крансо, сахарной заводонь кепедемстэ. Виев вармась сезизе таркастонзо кранонть ды сон кармась ардомо тупикенть ёнов. А сонзэ стрелазо новольсь шлямо кудонть велькссэ, косо ульнесть ават эйкакшост марто. Татьяна велявтызе кранонь стреланть лия ёнов, тень эйстэ кранось прась. Тейтересь маштовсь. Заводонть кепедизь, сонзэ территориясо кувать шкань перть аштесь Татьяна Бибинанень лецтнемань лаз. Заводонь неень прявтось прась мельс путомс крановщицантень кеврунго. Те тевенть топавты содавикс скульпторось Николай Филатов. Лиятнень эйстэ мейсэяк а явовиця эрзянь тейтересь, кона чачсь Атяшевань ёнксонь Челпанова велесэ, идесь комсте ламо ломанень эрямот. Эрьва скульптуранть теемадо икеле Николай Филатов аволь ансяк вансы улиця фотографиятнень, сон бажи вастневемс сетнень марто, кить те ломаненть содылизь. Кеврунгось малав анок. Скульпторонть валонзо коряс — кадовсь ансяк аламодо витнемс.