Республикань архивсэ тешкстызь Ф.Ф.Советкинэнь чачома чистэнзэ 130 иень топодеманть. (ЭРЗЯ)

Республикань архивсэ ванстовиця документнэнь ютксо улить содавикс просветителенть, ученоенть, Федор Советкинэнь документэнзэ, фотографиянзо. Сонзэ лемесь сюлмавозь эрзянь школатнень туртов букварень теемадонть марто. Теде башка сонзэ редакциянзо ало нолдазельть тонавтомапельть и лия финно-угорской раськетнень туртов. Фёдор Советкинэнь лемензэ парсте содасызь васняяк кельсодыйтне. Эрзятненень жо сонзэ лементь эряви содамс весенень, мекс те ломанесь эрзянь келень васенце букварень автор. Кемкотовоксть сонзэ нолдакшнызь одс. Эряви меремс, Федор Фролович ульнесь чевте седей ломань, кона аноколь лездамс эсь раськень ломантненень. Теде кортыть выставкасонть невтезь сёрматне. Школань тонавтыцят, артист, морыцят- весе, кие пшкалесь сонензэ лезкс мельга, седе тов кадовиль тензэ паро ялгакс. Учёноесь пек ризнэсь эсь раськензэ кисэ, сон содась, кода стака сеть ломантненень, кие а содасы рузонь келенть. Истя стака ульнесь сонензэ эйкакшпингестэ, зярдо мольсь школав тонавтнеме ды эзизе чарькоде тонавтыцянть. Сестэ сонензэ рузонь кельстэ эрзянь кельс лездась ютавтомо велень священникесь. Течинь чис Россиянь финно-угорской республикань высшей школатнесэ Ф. Советкинэнь тевенть поладыть содавикс лем марто учёнойть.