Регионсонок од ладямо-аравтома! (ЭРЗЯ)
Госсобраниянь 7-це сессиясонть депутаттнэ ваннызь республикань прявт прокуроронь таркантень од кандидатуранть. Россиянь генпрокуроронь полавтыцясь содавтынзе весе пурнавозтнень Курск ёнксонь икелень прокуроронть Александр Филимоновонь марто. Паро валт лемезэнзэ евтась и республикань Прявтось Владимир Волков. Прокуратурасо Александр Филимонов 22-це ие. Ушодокшнось сон Белгород енксонь прокуратурасо старшей следовательстэ. Пачкодсь Курск ёнксонь прявт прокуророкс. Постсонть ульнесь 7 иеть. Ней закононть топавтоманзо мельга Филимоновнень сави ваномс Мордовиясо. Госсобраниянь депутаттнэ кандидатуранть кирдизь, ней валось Россиянь Президентнэнть мельга. Целанек регионсонть тевтне молить а беряньстэ. Закононь коламотне иеде иес аламолгадыть. Но те а корты седе – од прокуроронтень карми а мезе теемс. Тевтнеде сатышка: эряви еще седеяк пштистэ ваномс коррупциянть мельга, а кадомс мельтеме олячинь саемань таркатнень, малавгады масторлангонь Чемпионатось. Александр Филимонов алтась улемс панжадокс эрьва ломаненть туртов. Парламентарийтне ванкшность еще зярыя кевкстемат. Таго – бюджет. Сонзэ покшолмазо эзь полавтово, неке ярмактнень явовсть лия таркава. Саемга, Мундиалентень анокстамга седе ламо ярмак карми ютавтозь ошонь чачонь мазылгавтомас. Теде башка эрявить витнемс гидротехнической сооружениятнень, седе пек чадыведтенть икеле.