Раськень озкс 2016. (ЭРЗЯ)
Покш Игнатбуень Чукало велесэ медьковонь 9-це чистэ юты «Раськень озкс» республикань национально-фольклорной кенярксчись. Те эрзянь кезэрень кой, конань ютавтомсто ломантне пшкалить Инешкипазонтень ды вешить ванстомс сынст берянь пертьпельксстэ, зыянов вийде. Вешить максомс паро норов ды шумбрачи. Кенярксчись ушодови штатолонь кирвазтемасто ды озномасто. Эрьва бажицянтень мереви каямс тиринь ёнкссто ускозь мода Маронть лангс. Те коесь сюлми кезэрень ды неень шканть. Атянь эзементь ютавтомадо мельга «Руця» пелькстамосонть кочкасызь эрзянь сех мазый оршамопеленть, а виест весеменень мереви варчамс «Тюштянь налксематнесэ».