Покш Маризь велентень-465 иеть! (ЭРЗЯ)
Истямо покш дата тешкстасть Чаунзань райононь Покш Маризь велень эрицятне ды инжетне. Кенярксчись лиссь вейсэндицякс ды кудораськень. Кезэрень ёвтамотнень коряс, те велесь теевсь 16-це пингестэ! Пек мазый, лия ёнов а молиця тарканть кочкакшнызе Маризь чинязось, конантень Иван Грозный инязорось казекшнесь мода. Ламо иень перть велень эрицятне ванстыть эрзянь коест, эрить ояксчисэ лия раськетнень марто. Те велесь — Чаунзань райононь сех виевтнень ютксто вейкесь! Течинь чис тесэ эрить малав тежа ломанть. Чарькодеви, покш цётавкстнэнь топавтомга, савкшны ветямс покш важодема, васняяк, велень администрациянь прявтонтень. 8 иень перть те таркасонть Надежда Миронова.
Тесэ ули средней школа, эйкакшонь кужо, почта, культурань кудо, 2 библиотекат ды лия учрежденият, мезесь неень шкане вастневи аволь весе велетнесэ. Важодемань кеме лув, ломантненень лездамо, перть пелькссэ ванстовиця ваньксчи – весементь кирдемга администрациянь прявтось путы ламо вийть. Зярыя иеде теде икеле Покш Маризь велесэ ульнесь од специалистнэде а сатомадо стакачи, ней тевсь редявиксстэ полавтовсь. Велень каштанчись- нама, ломантне. Эрьва-кодамо отраслясо важодезь, сынь кандыть лезэ тиринь масторост туртов. Сюронь кастыцят ды тонавтыцят, культурасо ды спортсо важодицят, духовенствань представительть, кудораськетне, конат тешкстыть юбилейть, сыре ломанть ды сех од велень эрицятне! Весень сынст тешкстыть велень чинь покшчистэнть. Те покшчись уш совась эрямопингес кода велень сех покш ды неявикс события. Мельспаросо Покш Маризь велень эрицятне тагояк анокт молемс од изнявксос! Эрязо тиринь велест ещё ламо пингеть!